دینی و دُنیاوی پریشانیوں سے نجات کیلئے ارشادات
شیخ الاسلام مولانا مفتی محمد تقی عثمانی صاحب مدظلہ کے خطبات سے منتخب :۔
یہ پیسہ‘ یہ ساز و سامان‘ یہ مال و دولت جو کچھ تم جمع کر رہے ہو‘ یہ بذاتِ خود راحت دینے والی چیز نہیں ہے‘ راحت پیسے سے خریدی نہیں جا سکتی‘ وہ محض اللہ تعالیٰ کا عطیہ ہے‘ جب تک قناعت پیدا نہیں ہو گی اور جب تک یہ خیال پیدا نہ ہو گا کہ اللہ تعالیٰ حلال طریقے سے جتنا مجھے دے رہے ہیں، اسی سے میرا کام چل رہا ہے‘ اس وقت تک سکون حاصل نہ ہو گا۔ ورنہ کتنے لوگ ایسے ہیں جنکے پاس دولت بے حد و حساب ہے لیکن سکون نہیں‘ ایک لمحے کا قرار نہیں‘ رات کو نیند نہیں آتی‘ اور بھوک اڑی ہوئی ہے۔ یہ سب دنیا کی دوڑ کا نتیجہ ہے۔
۔’’راحت‘‘اس پیسے اور اس دولت کا نام نہیں بلکہ ’’راحت‘‘تو ایک قلبی کیفیت کانام ہے جو محض اللہ جل جلالہ کی عطا ہوتی ہے ۔ کوٹھی اور بنگلے کھڑے کر لو، نوکر چاکر جمع کر لو دروازے پر لمبی لمبی گاڑیاں کھڑی کر لو ، یہ سب چیزیںجمع کر لو اس کے باوجود یہ حال ہے کہ رات کو جب بستر پر لیٹتے ہیں تو نیند نہیں آتی ۔
حالانکہ اعلیٰ درجے کا بستر لگا ہوا ہے اعلیٰ درجے کی مسہری ہے شاندار قسم کے گدے اور تکیے لگے ہوئے ہیں ساری رات کروٹیں بدلتے گزر رہی ہے نیند کی گولیاں کھا کھا کر نیند لائی جارہی ہے وہ گولیاں بھی ایک حد تک کام دیتی ہیں اس کے بعد وہ بھی جواب دے جاتی ہیں دیکھئے !سامان راحت سب موجود ہیں۔بنگلے ہیں ،گاڑی ہے روپیہ پیسہ ہے ،ایئر کنڈیشنڈ کمرہ ہے آرام دہ بستر ہے لیکن رات کی بے چینی کو دور کرنے میں کوئی چیز کار آمد نہیں۔ وہ اسباب بے چینی دور نہیںکر سکتے بلکہ اللہ جل شانہ ہی اس بے چینی کو دور فرما سکتے ہیں ۔
شیخ الاسلام حضرت مولانا مفتی محمد تقی عثمانی صاحب کے ملفوظات اور تعلیمات پڑھنے کے لئے یہ لنک وزٹ کریں:۔
https://readngrow.online/category/mufti-taqi-usmani-words/