اپنی اصلاح کی فکر اور رجوع الی اللہ

حضرت مولانا مفتی محمد تقی عثمانی مدظلہ کے ایک خطاب سے انتخاب

دنیا کو جغرافیائی نظر سے دیکھا جائے تو انڈونیشیا سے لے کر مراکش تک ایک زنجیر ہے جو مسلمان ممالک سے پروئی ہوئی ہے‘ پورا عالم اسلام ایک زنجیر میں جڑا ہوا ہے اور اللہ تبارک وتعالیٰ نے زمین کا وہ خطہ مسلمانوں کو عطا فرمایا ہے جو مختلف وسائل سے مالا مال ہے‘ یہ وہ خطہ ہے جس کی جنگی حکمت عملی کے اعتبار سے پوری دنیا کو کنٹرول کیا جاسکتا ہے۔

نہر سوئز مسلمانوں کے قبضے میں ہے جو بحر اسود کو بحر احمر سے ملاتی ہے جس کا مطلب یہ ہے کہ یورپ سے ایشیا آنے کاواحد راستہ نہر سوئز ہے‘ ابنائے فاسفورس بحر اسود کو بحر متوسط سے ملاتی ہے جس کے ذریعے روس ایشیا اور یورپ جاسکتے ہیں‘ خلیج عدن جو درحقیقت پورے عرب ممالک کا دروازہ سمجھا جاتا ہے وہ مسلمانوں کے قبضہ میں ہے۔

آج کل دنیا میں سب سے بڑی دولت زرسیال ’’بہتا ہوا سونا‘‘ کہلاتا ہے وہ مسلمانوں کے قبضہ میں ہے یہاں تک کہ دنیا میں یہ جملہ ضرب المثل بن گیا ہے کہ ’’جہاں مسلمان ہے وہاں تیل ہے‘‘ تو اللہ تبارک وتعالیٰ نے یہ وسائل مسلمانوں کو عطا فرمائے ہیں۔

لیکن حالت یہ ہے کہ مسلمانوں کی حیثیت دوسری اقوام کے مقابلہ میں اتنی کمزور ہے کہ دنیا کی دوسری اقوام مسلمانوں کو نوالہ تر بنانے کی فکر میں ہیں بلکہ بڑی حد تک بنا چکی ہیں جیسا کہ حدیث شریف میں ہے کہ تمہاری تعداد زیادہ تو ہوگی لیکن سیلاب میں بہتے ہوئے خس و خاشاک کی مانند ہوں گے آج وہ کیفیت ہمارے سامنے ہے۔

اصل صورتحال یہ ہے کہ حکمران طبقے کی اکثریت مغربی طاقتوں کی آلہ کار بنی ہوئی ہے۔ الا ماشاء اللہ! یہ حکمران کیوں ہمارے اوپر مسلط ہیں؟ اس کی وجہ نبی کریم صلی اللہ علیہ وسلم نے بیان فرمائی تھی کہ ’’اَعْمَالُکُمْ عُمَّالُکُمْ‘‘ (جیسے تمہارے اعمال ویسے تمہارے حکمران) اس لئے اس وقت پوری امت مسلمہ کو جو مسائل درپیش ہیں ان کا سبب ہمارے اعمال ہیں۔

میرے نزدیک ہماری کامیابی دو چیزوں پر منحصر ہے‘ اس پر ہم بھی عمل کریں اور دوسروں کو بھی پیغام پہنچائیں تو کچھ بعید نہیں کہ اللہ تبارک وتعالیٰ ہمارے حالات بدل دے‘ ایک اپنی اصلاح کی فکر اور دوسرے رجوع الی اللہ کا اہتمام کریں‘ یہ دو چیزیں پیدا ہوجائیں تو مجھے پوری طرح یقین ہے کہ صورتحال بدل سکتی ہے۔

قرب قیامت میں اپنی اصلاح کی تاکید خود نبی کریم صلی اللہ علیہ وسلم نے فرمائی کہ جب قیامت کے قریب حالات خراب ہوجائیں‘ معاشرہ بگڑ جائے‘ بے دینی پھیل جائے‘ کفر امڈنے لگے‘ دشمنوں کی طاقتیں ہمارے خلاف استعمال ہونے لگیں تو اپنی فکر کرو (ترمذی)

شیخ الاسلام حضرت مولانا مفتی محمد تقی عثمانی صاحب کے ملفوظات اور تعلیمات پڑھنے کے لئے یہ لنک وزٹ کریں:۔
https://readngrow.online/category/mufti-taqi-usmani-words/