رمضان میں حرام آمدنی والے کے لئے حلال روزی کی آسان تدبیر

ملفوظاتِ حکیم الامت مجددالملت حضرت مولانا محمد اشرف علی تھانوی رحمۃ اللہ علیہ

ارشاد فرمایا کہ یہ سوال پیدا ہو سکتا ہے کہ صاحب l! سب چیزوں کا تقویٰ تو آسان ہے لیکن حرام آمدنی سے کیسے بچیں اس لئے کہ ہمارا تو سب مال حرام ہے۔ غلہ ہے وہ حرام آمدنی کا ہے لباس ہے وہ ناجائز ہے، اب اس کو کیسے چھوڑیں، یہ سخت مشکل ہے۔ میں اس کا بھی علاج بتلاتا ہوں اگرچہ اس کے ظاہر کرنے کی جرأت تو نہ ہوتی تھی مگر میں دیکھتا ہوں کہ مسلمان بہت تباہ حالت میں ہیں۔ دین سے بہت دور جا گرے ہیں اس لئے ضرورت کی وجہ سے ظاہر کرتا ہوں۔ فقہاء رحمہ اللہ کو اللہ تعالیٰ جزائے خیر دے کہ ہمارے لئے انہوں نے ایسی سہولتیں نکال دی ہیں کہ اگر ان سہولتوں کے ہوتے ہوئے بھی کوئی حرام میں مبتلا ہو تو وہ بڑا ہی بدبخت ہے۔ وہ یہ کہ فقہاء نے لکھا ہے کہ اگر کوئی شے قرض کے روپیہ سے خریدی جائے اور وہ قرض حرام آمدنی سے ادا کر دیا جائے تو اس شے میں خبت کا اثر نہیں آتا گو حرام آمدنی کا گناہ ہوگا تو آپ یہ کیجئے کہ رمضان بھر کے لئے تمام اشیاء کھانے پینے کی نقد نہ خریدئیے بلکہ کسی مہاجن سے یا کسی دوسرے مسلمان سے جس کی آمدنی حلال ہو قرض لے کر تمام سامان خرید لیجئے اور پھر وہ قرض جہاں سے چاہے ادا کر دیجئے ۔ اس طور سے آپ حرام مال کے اثر سے رمضان بھر کے لئے بچ سکتے ہیں۔ لیجئے سب سے زیادہ سخت سوال کا بھی جواب ہوگیا۔ اس صورت میں گو حرام روپیہ سے قرض ادا کرنے کا گناہ ہوگا مگر حرام کھانے سے تو بچ گیا۔

نوٹ:- یہ ملفوظات ڈاکٹر فیصل صاحب (خلیفہ شیخ الحدیث حضرت مولانا عبدالمتین بن حسین شاہ صاحب دامت برکاتہم العالیہ) نے انتخاب فرمائے ہیں۔ اور انکو حضرت مولانا محمد زبیر صاحب (فاضل جامعہ دارالعلوم الاسلام لاہور 2023) نے تحریر فرمایا ہے ۔
یہ ملفوظات آپ ہماری ویب سائٹ
https://readngrow.online
پر بالکل مفت میں پڑھ سکتے ہیں ۔
براہ مہربانی یہ پوسٹ اپنے واٹس ایپ اور دیگر سوشل میڈیا پر شئیر کریں ۔