غصہ کا چھٹا علاج

ملفوظاتِ حکیم الامت مجددالملت حضرت مولانا محمد اشرف علی تھانوی رحمۃ اللہ علیہ

ارشاد فرمایا کہ گو غصہ اپنے سے کم مرتبہ والے پرآ تا ہے مگر انسان سوچے کہ اس کی کیا دلیل ہے کہ میں بڑا ہوں اور یہ چھوٹا ہے۔اس وقت میں زبردست ہوں لیکن ممکن ہے ابھی ذرا دیر میں یہ زبردست ہو جاۓ اور میں زیر دست ہو جاؤں ۔ایسے واقعات دنیا میں ہوتے رہتے ہیں ۔ یہ ہماری صرف کوتاہ نظری اور غفلت ہے کہ یاد نہیں رکھتے اور اگر مان بھی لیا جائے کہ وہ شخص زبردست نہیں ہوسکتا تو دنیا میں نہیں ہوسکتا ۔یہ سوچنا چاہئے کہ ممکن ہے کہ آخرت میں مجھ سے بہتر ہو اور بلکہ دنیا ہی میں خدا تعالیٰ کے نزدیک مقرب ہو اور حق تعالیٰ کے اولیاء میں سے ہو کسی کی نیکی اور بدی پیشانی پرلکھی ہوئی نہیں ہوتی ۔ اگر وہ خدا تعالیٰ کے اولیاء میں سے ہے تو اس کی نسبت حق تعالیٰ کا یہ اعلان ہے کہ میرے اولیاء کو جو کوئی ستاتا ہے تو میں اس کو اس نظر سے دیکھتا ہوں جس سے شیر اس شخص کو دیکھتا ہے جو اس کے بچوں کو چھیڑتا ہے ۔ اور ایک حدیث میں ہے کہ جو شخص میرے کسی مقرب بندہ سے عداوت رکھے میں اس کو اعلانِ جنگ دیتا ہوں،وہ مجھ سے لڑنے کے لئے تیار ہے *العظمة لله* جب کسی دنیا کے حاکم سے بگاڑ ہو جاتا ہے تو کسی کی کچھ نہیں چلتی ۔ خدا تعالیٰ کے سامنے کیا کوئی پیش لے جاسکتا ہے ۔ گو و شخص ضعیف ہے مگر اس کی پناہ میں سب سے بڑا زبردست موجود ہے۔

نوٹ:- یہ ملفوظات ڈاکٹر فیصل صاحب (خلیفہ شیخ الحدیث حضرت مولانا عبدالمتین بن حسین شاہ صاحب دامت برکاتہم العالیہ) نے انتخاب فرمائے ہیں۔ اور انکو حضرت مولانا محمد زبیر صاحب (فاضل جامعہ دارالعلوم الاسلام لاہور 2023) نے تحریر فرمایا ہے ۔
یہ ملفوظات آپ ہماری ویب سائٹ
https://readngrow.online
پر بالکل مفت میں پڑھ سکتے ہیں ۔
براہ مہربانی یہ پوسٹ اپنے واٹس ایپ اور دیگر سوشل میڈیا پر شئیر کریں ۔