امراضِ دل کیلئے روحانی طبیب کی ضرورت

شیخ الاسلام مولانا مفتی محمد تقی عثمانی صاحب مدظلہ کے ایک وعظ کا خلاصہ

اخلاق کی درستگی اتنا ہی ضروری اور اتنا ہی اہم ہے جتنا کہ عبادات کو بجا لانا ضروری ہے۔ عرف عام میں اخلاق اس کو کہتے ہیں کہ ذرا مسکرا کر کسی سے مل لیے۔ کسی کے ساتھ خندہ پیشانی یا نرمی سے بات کرلی‘ اس کو لوگ کہتے ہیں کہ یہ بہت خوش اخلاق آدمی ہے لیکن اصل اخلاق یہ نہیں بلکہ اخلاق انسان کے باطن کی‘ اس کے دل کی اور اس کی روح کی ایک صفت ہے۔

انسان کے باطن میں مختلف قسم کے جذبات‘ خیالات اور خواہشات پروان چڑھتے ہیں‘ ان کو اخلاق کہتے ہیں اور ان کو درست کرنے کی ضرورت پر زور دیا گیا ہے۔ جس طرح انسان کے جسم میں بہت سی صفات ہوتی ہیں اسی طرح روح کی بھی کچھ صفات ہوتی ہیں۔ جس طرح انسان کے جسم کو بیماریاں لگ جاتی ہیں اسی طرح روح کو بھی بیماریاں لگتی ہیں۔

روح کو کیا بیماریاں لگتی ہیں؟ کبھی اس میں تکبر پیدا ہوگیا‘ کبھی حسد پرورش پانے لگا‘ کبھی اس میں بغض پیدا ہوگیا‘ کبھی ناشکری پیدا ہوگئی یہ سب روح کی بیماریاں ہیں۔ فلاں شخص کا چہرہ بہت خوبصورت ہے‘ اس کی آنکھیں بہت خوبصورت ہیں یہ چیزیں جسم کی خوبصورتی کہلاتی ہیں۔ اسی طرح روح کی بھی کچھ خوبصورتی ہے اس کا بھی کچھ جمال ہے۔

روح کا حسن کیا ہے؟ روح کا حسن یہ ہے کہ انسان کے اندر تواضع ہو‘ صبر و شکر ہو‘ اخلاص ہو‘ خودپسندی نہ ہو‘ ریا کاری نہ ہو یہ سب روح کا حسن و جمال ہے۔

شیخ الاسلام حضرت مولانا مفتی محمد تقی عثمانی صاحب کے ملفوظات اور تعلیمات پڑھنے کے لئے یہ لنک وزٹ کریں:۔
https://readngrow.online/category/mufti-taqi-usmani-words/