ہر حاجت ان ہی سے مانگے (ملفوظات شیخ الاسلام حضرت مولانا مفتی محمد تقی عثمانی مدظلہ العالی)۔

ایک صاحب نے عرض کیا کہ حضرت! جب اس دفعہ میں امریکہ گیا تو الحمدللہ حضرت کے بتائے ہوئے فارمولے پر عمل کرنے کی کافی توفیق ہوئی۔ جب بھی کوئی مشکل پیش آتی تھی تو فوراً اللہ تعالیٰ سے دعا کرتا تھا کہ یا اللہ! اس مشکل کو دور فرما دیجئے۔ یہاں تک کہ اگر بس اسٹاپ پہ بس کے آنے میں دیر ہوتی تھی تو بھی اللہ تعالیٰ سے دعا کرتا تھا۔ حضرت یہ سن کر بہت زیادہ خوش ہوئے اور ان صاحب کے لئے دعا فرماتے رہے۔ پھر فرمایاکہ اصل حقیقت یہی ہے کہ انسان ہر ضرورت میں انہی کی طرف رجوع کرے اور ان ہی سے مانگے۔ ہمارے بھائی ولی رازی صاحب نے ایک دفعہ بتایا کہ انہوں نے دیکھا کہ ان کی بہو اپنے بچے کو مار رہی تھی، اور بچہ امی، امی کر کے اپنی ماں سے ہی لپٹ رہا تھا۔ یعنی غور کرنے کی بات یہ ہے کہ بچے کو ماں سے ایسی محبت ہوتی ہے کہ ماں بچے کو جب مار رہی ہوتی ہے اس وقت بھی وہ ماں سے ہی لپٹتا ہے اوراسی سے فریاد کرتا ہے۔ انسان کو اللہ تعالیٰ سے کم از کم اتنا تعلّق تو ہو جتنا بچے کو اپنی ماں سے ہوتا ہے۔

یہ ملفوظات حضرت ڈاکٹر فیصل صاحب نے انتخاب فرمائے ہیں ۔

شیخ الاسلام حضرت مولانا مفتی محمد تقی عثمانی صاحب کے ملفوظات اور تعلیمات پڑھنے کے لئے یہ لنک وزٹ کریں:۔
https://readngrow.online/category/mufti-taqi-usmani-words/