وضو میں اٹھارہ سنتیں ہیں

ان کو ادا کرنے سے کامل طریقے سے وضو ہو جائے گا جس وقت بھی آپ وضو کریں ان سنتوں کا خیال رکھیں۔
۔(۱) وضو کی نیت کرنا‘ مثلاً یہ کہ میں نماز کے مباح ہونے کے لئے وضو کرتا ہوں (۲) بِسْمِ اﷲِ الرَّحْمٰنِ الرَّحِیْمِ پڑھ کر وضو کرنا‘ بعض روایات میں وضو کی بسم اللہ اس طرح آئی ہے۔ بِسْمِ اﷲِ الْعَظِیْمِ وَالْحَمْدُ لِلّٰہِ عَلٰی دِیْنِ الْاِسْلَامِ۔ (۳) دونوں ہاتھوں کو پہنچوں تک تین بار دھونا (۴) مسواک کرنا‘ اگر مسواک نہ ہو تو انگلی سے دانتوں کو ملنا (۵) تین بار کلی کرنا (۶) تین بار ناک میں پانی چڑھانا (۷) تین بار ہی ناک چھینکنا (۸) ہر عضو کو تین تین بار دھونا (۹) چہرہ دھوتے وقت داڑھی کا خلال کرنا (۱۰) ہاتھوں اور پیروں کو دھوتے وقت انگلیوں کا خلال کرنا (۱۱) ایک بار تمام سر کا مسح کرنا (۱۲) سر کے مسح کے ساتھ کانوں کا مسح کرنا (۱۳) اعضاء وضو کو مل مل کر دھونا (۴) پے در پے وضو کرنا (۱۵) ترتیب وار وضو کرنا (۱۶) داہنی طرف سے پہلے دھونا۔ (۱۷) وضو کے بعد کلمہ شہادت پڑھنا اَشْھَدُ اَنْ لَّآ اِلٰـہَ اِلَّا اللّٰہُ وَاَشْھَدُ اَنَّ مُحَمَّدًا عَبْدُہٗ وَرَسُوْلُـہٗ (۱۸) جس وقت وضو کرنا دل کو ناگوار ہو اس وقت بھی خوب اچھی طرح سے وضو کرنا (نور الایضاح)
سنت-۱: جن اوقات میں نماز نفل پڑھنا مکروہ ہے ان کے علاوہ باقی اوقات میں جب وضو کریں وضو کے بعد دو رکعت نماز تحیۃ الوضو پڑھنا (بخاری و مسلم) اوقات مکروہہ یہ ہیں‘ صبح صادق کے بعد سے اشراق کے وقت تک ‘ زوال کے وقت عصر کے فرض پڑھنے کے بعد سے غروب آفتاب تک اور سورج غروب ہوتے وقت۔
سنت- ۲:نماز دھیان لگا کر پڑھنا (مسلم)
سنت- ۳:تحیۃ الوضو کے بعد اپنے گناہوں کی معافی مانگنا۔ (احمد)

مسواک کے متعلق سنتیں

سنت- ۱:ہر وضو کرتے وقت مسواک کرنا سنت ہے (احمد)
سنت- ۲:مسواک ایک بالشت سے زیادہ لمبی نہ ہو اور انگلی سے زیادہ موٹی نہ ہو (بحرالرائق )

وضو کے علاوہ دیگر اوقات جن میں مسواک کرنا سنت یا مستحب ہے

۔(۱) قرآن مجید کی تلاوت کرنے کے لئے (۲) حدیث شریف پڑھنے یا پڑھانے کے لئے (۳) منہ میں بدبو ہو جانے کے وقت (۴) علم دین پڑھنے یا پڑھانے کے وقت (۵) ذکر الٰہی سے پہلے (۶) خانہ کعبہ یا حطیم میں داخل ہونے کے وقت (۷) اپنے گھر میں داخل ہونے کے بعد (۸) بیوی کے ساتھ مجامعت سے پہلے (۹) کسی بھی مجلس خیر میں جانے سے پہلے (۱۰) بھوک پیاس لگنے کے وقت (۱۱) موت کے آثار پیدا ہو جانے کے وقت (۱۲) سحر کے وقت (۱۳) کھانا کھانے سے قبل (۱۴) سفر میں جانے سے قبل (۱۵) سفر سے آجانے کے بعد ‘ (۱۶) سونے سے پہلے (۱۷) سو کر اٹھنے کے بعد (حاشیہ ترغیب و ترہیب للمنذری)
اب آپ وضو سے فارغ ہو گئے تو فجر کی نماز جماعت سے پڑھنے کے لئے مسجد کو چلیں اس وقت مندرجہ ذیل سنتوں کا خیال رکھئے اور یہ پانچوں وقتوں میں خیال رکھنا ہو گا۔
سنت- ۱:ہر نماز کے لئے باوضو ہو کر گھر سے چلنا (بخاری)
سنت- ۲:گھر سے چلتے وقت نماز پڑھنے کی نیت سے چلنا‘ یعنی اصل اور مقدم نیت نماز پڑھنے کی ہی کرنی چاہئے (بخاری)
سنت- ۳:اذان سننے کے بعد نماز پڑھنے کے لئے اس طرح دنیوی مشاغل کو ترک کر دینا کہ ان مشاغل سے سروکار ہی نہیں ہے (نشرالطیب)
سنت-۴: تکبیر اولیٰ کے ساتھ نماز پڑھنا (ترمذی)

سنت والی زندگی اپنانے کے لئے ہماری ویب سائٹ
https://readngrow.online
پر مطلوبہ کیٹگری میں دیکھئے ۔ اور مختلف اسلامی مواد سے باخبر رہنے کے لئے ویب سائٹ کا آفیشل واٹس ایپ چینل بھی فالو کریں ۔ جس کا لنک یہ ہے :۔
https://whatsapp.com/channel/0029Vb0Aaif4o7qSPFms4g1M