نامحرم رشتہ داروں سے پردہ

بسلسلہ ملفوظات حکیم الامت حضرت مولانا اشرف علی تھانوی نور اللہ مرقدہ

ارشاد فرمایا کہ ایک کوتاہی عورتوں کی یہ ہے کہ ان میں پردہ کا اہتمام کم ہے ، اپنے رشتہ داروں میں جو نامحرم ہیں ان کے سامنے بے تکلف آتی ہیں ۔ ماموں زاد، چچا زاد، خالہ زاد، پھوپھی زاد بھائیوں سے بالکل پردہ نہیں کرتی ہیں اور غضب یہ ہے کہ ان کے سامنے بناؤ سنگار کرکے بھی آتی ہیں ۔ پھر بدن چھپانے کا ذرا اہتمام نہیں کرتیں، گلا کھلا اور سر کھلا ہوا ہے اور ان کے سامنے آجاتی ہیں اور اگر کسی کا سارا بدن ڈھکا ہوا بھی ہو تو کپڑے ایسے باریک ہوتے ہیں جن میں سارا بدن جھلکتا ہے حالانکہ باریک کپڑے پہن کر محارم کے سامنے بھی آنا جائز نہیں کیونکہ محارم سے ماتحت الازار (یعنی ناف کے نیچے کے حصے) کے علاوہ پیٹ اور کمر اور پہلو اور پسلیوں کا چھپانا بھی فرض ہے ، پس ایسا باریک کرتہ پہن کر محارم کے سامنے آنا بھی جائز نہیں جس سے پیٹ یا کمر یا پہلو یا پسلیاں ظاہر ہوں یا ان کا کوئی حصہ نظر آتا ہو ۔ شریعت نے تو محارم کے سامنے آنے میں بھی اتنی قیدیں لگائی ہیں اور آج کل کی عورتیں نامحرموں کے سامنے بھی بیباکانہ آجاتی ہیں ، گویا شریعت کا پورا مقابلہ ہے۔ اے عورتو! پردہ کا اہتمام کرو اور نامحرم رشتہ داروں کے سامنے قطعاََ نہ آؤ اور محارم کے سامنے احتیاط سے آؤ۔ (احکام ِ پردہ عقل و نقل کی روشنی میں،صفحہ ۱۰۳)

حکیم الامت حضرت مولانا اشرف علی تھانوی رحمہ اللہ تعالیٰ کے یہ ملفوظات احکام پردہ کے متعلق ہیں ۔ ۔ خود بھی پڑھیں اور دوستوں سے بھی شئیر کریں ۔
مزید ملفوظات پڑھنے کے لئے ہماری ویب سائٹ
https://readngrow.online
اپنے پاس محفوظ کرلیں ۔
اس طرح کے ملفوظات روزانہ اس واٹس ایپ چینل پر بھی بھیجے جاتے ہیں
https://whatsapp.com/channel/0029VaJtUph4yltKCrpkkV0r
چینل جوائن کریں