عورتیں واقعی بڑی محسن اور تمہارے دین کی محافظ ہیں

ملفوظاتِ حکیم الامت مجدد الملت حضرت مولانا محمد اشرف علی تھانوی رحمۃ اللہ علیہ

ارشاد فرمایا کہ عورتوں کا ایک حق تو اس واسطے ہے کہ وہ بے کس اور بے بس ہیں ۔ دوسرے اس واسطے بھی حق ہے کہ وہ تمہاری دوست ہیں اور دوستی کی وجہ سے حق بڑھ جاتا ہے۔ پھر وہ تمہارے دین کی بھی محافظ ہیں۔ بیوی اس لحاظ سے بھی قابل قدر ہے کہ اس سے دین کی حفاظت اور خیالات فاسدہ کی روک تھام ہوتی ہے۔ اس درجہ میں وہ بڑی محسن ہے۔ جولوگ دیندار ہیں وہ اس احسان کی قدر کرتے ہیں۔ اس لیے بیوی کی قدر کرنی چاہئے کیونکہ وہ دنیا اور دین دونوں کی معین و مددگار ہے۔ اس کے حقوق کی رعایت بہت زیادہ ضروری ہے کیونکہ اس میں چند خصوصیات ایسی ہیں جن میں ہر ایک کے بہت زیادہ حقوق ہیں۔ خدا تعالی نے یہ تعلق ایسا بنایا ہے کہ بیوی سے زیادہ کوئی بھی انسان کو راحت نہیں دے سکتا۔ بیماری میں بعض دفعہ سارے رشتہ دار الگ ہو کر ناک منہ چڑھانے لگتے ہیں، خصوصاً اگر کسی کو دستوں کی بیماری ہو جائے مگر بیوی سے یہ نہیں ہوسکتا کہ و ہ شوہر کو اس حال میں چھوڑ دے۔ وہ بیماری میں سب سے زیادہ راحت پہنچاتی ہے، یہ تو بیوی سے دنیا کی راحت ہے۔ اور دین کی راحت یہ ہے کہ گھر کے انتظام سے بے فکری ہو جاتی ہے جس سے قلب کو فراغ و اطمینان حاصل ہوتا ہے۔ تجربہ ہے کہ بغیر بیوی کے گھر کا انتظام نہیں ہوسکتا۔

نوٹ:- یہ ملفوظات ڈاکٹر فیصل صاحب (خلیفہ عبدالمتین شاہ صاحب دامت برکاتہم العالیہ) نے انتخاب فرمائے ہیں۔ اور انکو حضرت مولانا محمد زبیر صاحب (فاضل جامعہ دارالعلوم الاسلام لاہور 2023) نے تحریر فرمایا ہے ۔
یہ ملفوظات آپ ہماری ویب سائٹ
https://readngrow.online
پر بالکل مفت میں پڑھ سکتے ہیں ۔
براہ مہربانی یہ پوسٹ اپنے واٹس ایپ اور دیگر سوشل میڈیا پر شئیر کریں ۔