علماء کو عوام کے تابع بن کر نہیں رہنا چاہیے

ملفوظاتِ حکیم الامت مجدد الملت حضرت مولانا محمد اشرف علی تھانوی رحمۃ اللہ علیہ

ارشاد فرمایا کہ علماء کو عوام اور جہلاء کا تابع بن کر نہیں رہنا چاہیے، اس سے دین کی عظمت اور احترام ان لوگوں کے قلوب سے نکل جانے کا اندیشہ ہے۔ آج جو عوام کی ہمت اور جرأت بڑھ گئی کہ وہ اہلِ علم کو حقیر سمجھتے ہیں اس کا سبب یہ اہل علم ہی ہوئے ہیں۔ مجھے جو عوام کی حرکت یا ان کے کسی فعل پر اس قدر جلد تغیر ہوجاتا ہے اس کا سبب یہ خیال ہوتا ہے کہ اس کی کیا وجہ ہے کہ اہلِ دنیا جو مال کی وجہ سے بڑے ہیں یا حکام جو جاہ کی وجہ سے بڑے ہیں، یہ عوام ان کے ساتھ بے فکری کا برتاؤ کیوں نہیں کرتے جو اہلِ علم سے کرتے ہیں، ان کے سامنے جاکر کیوں بھیگی بلی بن جاتے ہیں۔ یہ سب علماء کے ڈھیلے پن کی بدولت ہے۔ میں کہا کرتا ہوں کہ نہ تو ڈِھیلے بنو اور نہ ڈھیلے ہو جس سے دوسرے کو چوٹ لگے، توسط کے درجے میں رہو۔ نہ تو اس قدر کڑوے بنو کہ کوئی تھوک دے اور نہ اس قدر میٹھے کہ دوسرا نگل جائے۔ آج کل تو یہاں تک نوبت آگئی ہے کہ بعض علماء مسائل کے جواب میں عوام کے مذاق کی رعایت کرنے لگے۔ مجھ کو تو اس طرز پر بے حد افسوس ہے، یہ اہلِ علم کی شان کے خلاف ہے۔ مسائل کے جواب کے وقت اہلِ علم کی شان یہ ہونی چاہیے جیسے حاکم کی اجلاس پر ہونے کے وقت شان ہوتی ہے۔

نوٹ:- یہ ملفوظات ڈاکٹر فیصل صاحب (خلیفہ شیخ الحدیث حضرت مولانا عبدالمتین بن حسین شاہ صاحب دامت برکاتہم العالیہ) نے انتخاب فرمائے ہیں۔ اور انکو حضرت مولانا محمد زبیر صاحب (فاضل جامعہ دارالعلوم الاسلام لاہور 2023) نے تحریر فرمایا ہے ۔
یہ ملفوظات آپ ہماری ویب سائٹ
https://readngrow.online
پر بالکل مفت میں پڑھ سکتے ہیں ۔
براہ مہربانی یہ پوسٹ اپنے واٹس ایپ اور دیگر سوشل میڈیا پر شئیر کریں ۔