صرف چار تک بیویاں رکھنے کی اجازت کیوں ہے؟

بسلسلہ ملفوظات حکیم الامت حضرت مولانا اشرف علی تھانوی نور اللہ مرقدہ

چار سے زائد عورتیں نکاح میں لانا کیوں ناجائز ہیں؟غور کرنے سے معلوم ہوتا ہے کہ یہ ضروری تھا کہ بیویاں کرنے کی ایک خاص حد ہوتی ورنہ اگر حد مقرر نہ ہوتی تو لوگ حد اعتدال سے نکل کر سینکڑوں بیویاں کرنے کی نوبت پہنچاتے اور ایسا کرنے سے ان بیویوں پر اور خود اپنی جانوں پر ظلم اور بے اعتدالیاں کرتے اور ضرورت چار سے پوری ہوگئی تھی اس لیے زائد کو ناجائز قرار دیا۔ چار نکاح سے متجاوز ہونے کی ایک حکمت یہ بھی ہے عورت کا فی نفسہٖ حق قضاء وطر( خواہش پوری کرنا) ہے اور نکاح کی اصلی مصلحت (یعنی اولاد حاصل کرنا جو حمل قرار پانے پر موقوف ہے) وہ بھی اس بات کا مقتضی ہے کہ کم از کم ہر طہر میں ایک بار ہم بستری ہو جایا کرے ، اور صحیح المزاج عورت کو ہر ماہ میں ایک بار حیض ہوکر طہر ہوتا ہے۔ یہ تو عورت کی حالت ہے اور متوسط قوت کا مرد ایک ہفتہ میں ایک بار صحبت کرنے سے اپنی صحت کو محفوظ رکھ سکتا ہے یعنی ایک ماہ میں چار بار قربت کر سکتا ہے ۔ پس اس طرح اگر چار عورتیں ہوں گی تو ہر عورت سے ایک طہر میں ایک بار صحبت ہوگی اور اس سے زیادہ منکوحات میں یا تو مرد پر زیادہ تعب ہوکر اس میں قوتِ تولید (پیدائش کی قوت) نہ رہے گی ، اور یا عورت کا حق ادا نہ ہوگا اور چونکہ قانون عام ہوتا ہے اس لیے کسی خاص مرد کا زیادہ قوی ہونا اس حکمت میں مخل نہیں ہوسکتا۔ البتہ حضور ﷺ میں چونکہ قوت بھی زیادہ تھی اور آپ کو عام قوانین سے ممتاز کر کے بہت سی خصوصیات بھی عطا کی گئی ہیں ، اس لیے اس حکم میں آپ کو ایک خاص امتیاز عطا فرمایا گیا۔(صفحہ ۳۷۵،اسلامی شادی)

حکیم الامت حضرت مولانا اشرف علی تھانوی رحمہ اللہ تعالیٰ کے یہ ملفوظات نکاح یعنی اسلامی شادی سے متعلق ہیں ۔ ۔ خود بھی پڑھیں اور دوستوں سے بھی شئیر کریں ۔
مزید ملفوظات پڑھنے کے لئے ہماری ویب سائٹ
https://readngrow.online
اپنے پاس محفوظ کرلیں ۔
اس طرح کے ملفوظات روزانہ اس واٹس ایپ چینل پر بھی بھیجے جاتے ہیں
https://whatsapp.com/channel/0029VaJtUph4yltKCrpkkV0r
چینل جوائن کریں