دوسروں کے حقوق پہچانیں (10)۔

مصلح الامت حضرت مولانا شاہ وصی اللہ الٰہ آبادی رحمہ اللہ تعالیٰ نے ارشاد فرمایا:۔
۔’’ہر شخص دوسرے کا حق پہچانے ۔ چھوٹا بڑے کا حق پہچانے، شاگرد اپنے استاذ کا حق پہچانے، بیٹا باپ کاحق پہچانے، مرید پیر کا حق پہچانے، محکوم حاکم کا حق پہچانے اور رعایا بادشاہ کا حق پہچانے ۔ تو فلاحِ دنیا کا یہی ذریعہ ہے‘‘۔
یہ ایک بہترین نصیحت ہے کیونکہ آج کل معاشرے میں فسادات کی بڑی وجہ یہی ہے کہ ہم دوسروں کے حقوق پہچاننے کی بجائے اپنے حقوق یاد کرنا شروع کردیتے ہیں ۔ اولاد اکثر یہی سوچ لیتی ہے کہ والدین کے ذمہ میرے کون کون سے حقوق ہیں اور جو حقوق والدین کے اسکے ذمہ ہیں اُن سے غافل ہوجاتی ہے ۔
بلکہ اس سے بھی بڑی مثال یہ سمجھئے کہ میاں بیوی میں جھگڑوں اور اختلافات کی ننانوے فیصد یہی وجہ ہوتی ہے کہ بیوی کو وہ حقوق یاد ہوجاتے ہیں جو خاوند کے ذمہ ہوتے ہیں ۔ خاوند وہ حقوق یاد کرلیتا ہے جو بیوی کے ذمہ اسکے حقوق ہیں ۔ ساری زندگی اسی کشمکش میں گزر جاتی ہے کہ یہ میرے حقوق ادا نہیں کررہی اور بیوی کی یہ شکایت کہ یہ میرے حقوق ادا نہیں کررہے ۔ تو مصلح الامت حضرت مولانا شاہ وصی اللہ رحمہ اللہ تعالیٰ کے ارشاد کی تفصیل یہ ہے کہ ہمیشہ دوسروں کے حقوق پہچانو اور اُنکو ادا کرنے کی فکر میں لگے رہو ۔ جب تم دوسروں کے حقوق ادا کرو گے تو اسلام کا نظام ہی یہی ہے کہ اگر میاں حقوق ادا کرے تو بالطبع بیوی کو بھی خیال پیدا ہوگا ۔ بیٹا حقوق ادا کرے تو والدین بھی خوب محبت کریں گے ۔ مرید حقوق ادا کرے گا تو پیر صاحب بھی اُسکی طرف توجہ فرمائیں گے ۔ اگر شاگرد استاذ کے سارے حقوق ادا کرتا رہے گا تو استاذ بھی تعلیم اور تدریس کا حق ادا کرے گا ۔ ورنہ جس معاملہ میں بھی خود کو غافل بنا دیا اور دوسرے سے امید رکھی کہ وہ میرے حقوق مکمل ادا کرے تو پھر خرابی شروع ہوگئی ۔
اسمیں ایک بات اور شامل فرمالیں کہ دوسروں کے حقوق ادا کریں اور کرتے ہی رہیں ۔ ان شاء اللہ ایک روز ضرور مقابل کی کایا پلٹ جائے گی ۔ ایسا بھی نہیں کہ ادھر آپ نے حقوق مکمل ادا کئے اور اُدھر سے مقابل شخص فوراً مستعد ہوگیا ۔ بالکل نہیں ۔ بلکہ کچھ عرصہ تک لگاتار حقوق ادا کرتے رہیں اور پھر امن اور فلاح آپ خود ہی دیکھ لیں گے ۔
اللہ تعالیٰ ہم سب کو سمجھ عطا فرمائے۔ آمین ۔

نوٹ : یہ ’’آج کی بات‘‘ ایک بہت ہی مفید سلسلہ ہے جس میں حذیفہ محمد اسحاق کی طرف سے مشاھدات،خیالات اور تجربات پر مبنی ایک تحریر ہوتی ہے ۔ یہ تحریر ہماری ویب سائٹ
https://readngrow.online/
پر مستقل شائع ہوتی ہے ۔ ہر تحریر کے عنوان کے آگے ایک نمبر نمایاں ہوتا ہے ۔ جس اسکی قسط کو ظاہر کرتا ہے کہ یہ کون سی قسط ہے ۔ پچھلی قسطیں بھی ہماری ویب سائٹ پر دستیاب ہیں ۔ اگر کوئی پیغام یا نصیحت یا تحریر آپکو پسند آتی ہے تو شئیر ضرور کریں ۔ شکریہ ۔
مزید اپڈیٹس کے لئے ہمارے واٹس ایپ چینل کو ضرور فالو کریں
https://whatsapp.com/channel/0029Vb0Aaif4o7qSPFms4g1M