خلق خدا سے درگزر

بسلسلہ ملفوظات حکیم الامت حضرت مولانا اشرف علی تھانوی نور اللہ مرقدہ

ارشاد فرمایا کہ میں مدت سے یہ دعا مانگ رہا ہوں اور اب بھی تازہ کر لیا کرتا ہوں کہ اے اللہ میری وجہ سے اپنی کسی مخلوق سے مواخذہ نہ کیجیو۔ جو کچھ کسی نے میرے ساتھ برائی کی ہو یا آئندہ کرے ، سب میں نے دل سے معاف کی۔ اس لیے مخلوقِ خدا کو میری طرف سے بالکل بے فکر رہنا چاہیے بلکہ اگر کبھی ضرورت ہو تو میری طرف سے پوری اجازت ہے کہ جو کچھ چاہے مجھے کہہ سن بھی لے۔ پھر فرمایا کہ اگر میں معاف بھی نہ کر دیا کروں اور دوسرے کو عذاب بھی ہو تو مجھے کیا نفع حاصل ہوا۔ حضرت خواجہ صاحب ؒ نے عرض کیا کہ اس کی جو نیکیاں ملیں گی۔ فرمایا کہ ایسی قانونی نیکیاں لے کر میرا کیا بھلا ہو سکتا ہے اور اگر یہ فعل میرا مقبول ہوگیا تو اس کی بدولت ان شاء اللہ مجھے بے حد نیکیاں ملیں گی ۔ اللہ میاں کے ساتھ قانونی حساب کتاب کرنے سے کہیں کام چل سکتا ہے ، کیا اس کو یہ اختیار نہیں ہے کہ ایک شخص کو بغیر حق کے نیکیاں دے دے ، کیا اس کے یہاں نیکیوں کی کمی ہے ، یہی خیال کیوں نہ رکھے۔ پھر فرمایا کہ میں تو اس لیے سب کے حقوق معاف کر دیتا ہوں کہ اگر یہ فعل مقبول ہوگیا تو حق تعالیٰ سے امید ہے کہ اوروں سے وہ ان حقوق کو جو میرے ذمہ ہیں خود ہی معاف کرا لیں گے۔(۳۱۳ اشرفی جواہرات، صفحہ ۱۲۲)

حکیم الامت حضرت مولانا اشرف علی تھانوی رحمہ اللہ تعالیٰ کے یہ ملفوظات اشرفی جواہرات کے متعلق ہیں ۔ خود بھی پڑھیں اور دوستوں سے بھی شئیر کریں ۔
مزید ملفوظات پڑھنے کے لئے ہماری ویب سائٹ
https://readngrow.online
اپنے پاس محفوظ کرلیں ۔
اس طرح کے ملفوظات روزانہ اس واٹس ایپ چینل پر بھی بھیجے جاتے ہیں
https://whatsapp.com/channel/0029VaJtUph4yltKCrpkkV0r
چینل جوائن کریں