ایک عبرت انگیز واقعہ

ملفوظاتِ حکیم الامت مجدد الملت حضرت مولانا محمد اشرف علی تھانوی رحمۃ اللہ علیہ

ارشاد فرمایا کہ ایک حکایت تاریخ میں عجیب لکھی ہے کہ ایک شخص اپنی بیوی کے پاس بیٹھا کھا رہا تھا، اس وقت ایک فقیر مانگنے آیا، اس نے جھڑک دیا۔ اتفاق سے کچھ ایسا انقلاب ہوا کہ یہ بالکل تباہ و پریشان ہوگیا۔ حتیٰ کہ جب بیوی کا جب نان نفقہ نہ چل سکا تو اس کو بھی طلاق دے دی اور اس نے کسی اور دولت مند سے نکاح کر لیا۔ اتفاق سے اس دولت مند کے دروازے پر کوئی شخص سوال کرنے آیا۔ اس شخص نے بیوی سے کہا کہ اس کو بھیک دے آؤ۔ یہ جو دروازہ پرگئی تو وہاں سے روتی ہوئی لوٹی۔ شوہر نے پوچھا تو اس نے کہا کہ یہ سائل میرا پہلا شوہر ہے اور اسی تذکرہ میں وہ قصہ سائل کے جھڑک دینے کا بھی بیان کیا۔ اس شوہر ثانی نے کہا کہ وہ سائل جو جھڑکا گیا تھا میں ہوں، خدا تعالیٰ نے مجھ کو مال بھی دیا اور اس کی بیوی بھی دی تو خدا تعالیٰ کی بڑی قدرت ہے۔ عبرت حاصل کرو اور عبرت میں یہ بھی داخل ہے کہ جس کو کسی مصیبت میں مبتلا دیکھو اس کی مصیبت دور کردو۔

نوٹ:- یہ ملفوظات ڈاکٹر فیصل صاحب (خلیفہ شیخ الحدیث حضرت مولانا عبدالمتین بن حسین شاہ صاحب دامت برکاتہم العالیہ) نے انتخاب فرمائے ہیں۔ اور انکو حضرت مولانا محمد زبیر صاحب (فاضل جامعہ دارالعلوم الاسلام لاہور 2023) نے تحریر فرمایا ہے ۔
یہ ملفوظات آپ ہماری ویب سائٹ
https://readngrow.online
پر بالکل مفت میں پڑھ سکتے ہیں ۔
براہ مہربانی یہ پوسٹ اپنے واٹس ایپ اور دیگر سوشل میڈیا پر شئیر کریں ۔