اَسلاف کا مقام

فرمایا: حضرت مولانا انور شاہ کشمیری رحمۃ اللہ علیہ بہت اونچے درجہ کے محدث تھے، تمام علوم عربیہ میں آپ کو کمال حاصل تھا۔ خود فرمایا کرتے کہ اللہ نے مجھے ایسے علوم دیئے ہیں کہ ان علوم کی بنیاد پر اگر میں مجتہد ہونے کا دعویٰ کروں تو کرسکتا ہوں لیکن میں جانتا ہوں کہ مجتہدین کا مقام کتنا بلند ہے اور اتنے علوم جاننے کے باوجود میں فخر سے کہتا ہوں کہ میں امام ابو حنیفہ رحمۃ اللہ علیہ کا مقلد ہوں۔ حضرت مولانا اشرف علی تھانوی رحمۃ اللہ علیہ جو آپ کے ہم عصر اور بڑے تھے۔ حضرت شاہ صاحب رحمہ اللہ ان سے فیض حاصل کرنے کے لیے خانقاہ تشریف لے جاتے۔ حضرت تھانوی رحمہ اللہ فرماتے ہیں کہ انور شاہ کا علم اتنا غالب ہے کہ جب وہ میری مجلس میں آتے ہیں تو میرے قلب پر ان کے علم کا رُعب پڑتا ہے کہ مجھے گفتگو کرنے کا حوصلہ نہیں ہوتا۔ فرماتے کہ میرے پاس اسلام کے حق ہونے کی کوئی دلیل نہ ہوتی اور انور شاہ مسلمان ہوتے اور میں ان کی زیارت کرتا تو میں بغیر دلیل کے مسلمان ہو جاتا۔
حضرت شاہ صاحب رحمہ اللہ کا وصال ہوا تو حضرت عطاء اللہ شاہ بخاری رحمۃ اللہ علیہ نے فرمایا: علامہ انور شاہ رحمہ اللہ کی مثال یوں سمجھیں کہ صحابہ رضی اللہ عنہم کا قافلہ جارہا تھا، انور شاہ رحمہ اللہ پیچھے رہ گیا، یہ اُس دور کے لوگوں میں سے تھے لیکن پیدا اِس دور میں ہوئے۔(مجالس ناصریہ، ص:۵۱)